Icelandair mun hefja flug til Tampa

- Munu fljúga tvisvar í viku frá og með september 2017

5. október 2016

|

Frétt skrifuð kl. 06:05

Icelandair mun hefja flug til Tampa í september árið 2017

Icelandair mun hefja beint áætlunarflug til Tampa í Flórída sem mun verða nýr áfangastaður í leiðarkerfi félagsins á næsta ári.

Flugið til Tampa hefst þann 7. september 2017 og verður flogið tvisvar í viku og verður Tampa 41. áfangastaður félagsins í leiðarkerfi félagsins og sá sextándi í Norður-Ameríku en sautjándi flugvöllurinn vestanhafs þar sem Icelandair flýgur til tveggja flugvalla í New York.

Tampa er 3. stærsta borgin í „sólskinsfylkinu“ Flórída á eftir Jacksonville, sem er sú stærsta og Miami, sem er sú næst fjölmennasta.

Tampa er staðsett „hinumegin“ á Flórída við strönd Mexíkóflóa og eru íbúafjöldi borgarinnar um 350.000 manns en á stórborgarsvæðinu ásamt St. Petersburg og Clearwater búa um 2,8 milljónir en um 4 milljónir á öllu Tampa Bay svæðinu sem inniheldur Sarasota og Bradenton.

„Við teljum að íbúar á Tampa-svæðinu eigi eftir að njóta þess sem við höfum upp á að bjóða sem er flug milli Bandaríkjanna og Kanada til Evrópu“, segir Guðjón Arngrímsson, talsmaður Icelandair í viðtali við Tampa Bay Times en Tampa hefur verið til skoðunar hjá Icelandair um nokkurt skeið.

Flugtíminn til Tampa verður um sjö klukkustundir eða álíka langur og flugtíminn til Orlando en aðeins eru 130 kílómetrar sem skilja þessa tvo flugvelli að.

Tampa er mjög vinsæl ferðamannaborg þar sem margt er um að vera fyrir alla fjölskylduna en t.a.m. er stutt í hinn vinsæla skemmtigarð Busch Gardens, Florida Aquarium, Lowry Park dýragarðinn, Adventure Island, Ybor City og þá eru fjölmörg áhugaverð söfn þar að finna á borð við Museum of Science & Industry.

Tampa er 3. stærsta borg Flórída

Flugvöllurinn í Tampa ber merkinguna TPA en um völlinn fara 22 flugfélög sem fljúga til áttatíu áfangastaða í Norður-Ameríku, Mið-Ameríku, Karíbbahafsins og til Evrópu en völlurinn hefur oft ratað á Top 10 listann yfir bestu flugvellina í Bandaríkjunum.

Stærstu flugfélögin sem fljúga um Tampa-flugvöll eru Southwest Airlines, Spirit Airlines, American Airlines og Delta Air Lines en þau flugfélög sem fljúga til Tampa frá Evrópu eru British Airways, Edelweiss Air og Lufthansa en Icelandair verður fjórða evrópska flugfélagið sem mun fljúga þangað.