Heathrow færi leyfi fyrir þriðju flugbrautinni

- Ríkisstjórn Bretlands gefur grænt ljós til að stækka Heathrow

25. október 2016

|

Frétt skrifuð kl. 13:53

Frá Heathrow-flugvellinum í London

Leyfi hefur verið gefið fyrir þriðju flugbrautinni á Heathrow-flugvelli en ríkisstjórn Bretlands tilkynnti ákvörðun sína í flugvallarmáli Breta og var ákvörðunin tilkynnt formlega í morgun laust fyrir hádegi.

Chris Grayling, samgönguráðherra Bretlands, sagði akvörðunina vera „mjög örlagaríka“ og marka stórt skref í samgöngumálum Breta.

„Nákvæm staðsetningu fyrir þriðju flugbrautinni verður tekin fyrir á þinginu eftir áramót og verður þá gerð drög að stefnuyfirlýsingu vegna fyrirhugaðra framkvæmda en þessi ákvörðun undirstrikar skuldbindingu okkar um að viðhalda því að Bretland verði áfram samkeppnishæft í heimi viðskipta og að Heathrow verði einnig áfram leiðandi flugvöllur fyrir ferðamannaiðnaðinn“, segir í yfirlýsingu frá samgönguráðuneyti Bretlands.

Ríkisstjórn Bretlands hefur gefið leyfi fyrir þriðju flugbrautinni

Talið er að þriðja flugbrautin á Heathrow-flugvelli og framkvæmdirnar við brautina eigi eftir að skapa 77.000 ný störf á næstu 14 árum.

„Ég er stoltur yfir því að eftir margra ára viðræður og seinkun á afgreiðslu málsins sé loksins búið að taka ákvörðun og tryggja stöðu Bretlands í flugmálum sem mun skapa stór tækifæri á sviði atvinnu og viðskipta næstu áratugina“, segir Grayling.

Mjög skiptar skoðanir eru um málið en Boris Johnson, fyrrverandi borgarstjóri Lundúna, sagði þessa ákvörðun ekki af hinu góða og þingmenn fyrir Uxbridge og South Ruislip telja þrátt fyrir leyfisveitinguna samt vera mjög langt í land þar til að framkvæmdir munu hefjast.

Sadiq Khan, borgarstjóri Lundúna, er einnig á móti þriðju flugbrautinni og telur hann það vera ranga ákvörðun að ráðast í stækkun flugvallarins með nýrri flugbraut og í sama streng tekur John Sauven, forstjóri Greenpeace í Bretlandi, sem telur að framkvæmdirnar á þriðju flugbrautinni eigi eftir að valda mikilli mengun fyrir lífríki og þar að auki vera „sóun á tíma, fé og valda röskun á lífsgæðum fólks“.

Stór hópur ýmissa samtaka, félaga, fyrirtækja og fjárfesta fagna því að leyfi sé komið fyrir þriðju flugbrautinni þar sem það mun efla efnahag Breta og skapa ný atvinnutækifæri.

Nokkrir þingmenn á breska þinginu hafa hótað því að segja af sér og þar á meðal Zac Goldsmith, þingmaður fyrir Richmond Park, sem hefur tilkynnt að hann muni segja af sér þingstörfum ef stækkun Heathrow-flugvallarins verður samþykkt.