Tvær hljóðfráar þotur nálgast flugprófanir

25. janúar 2017

|

Frétt skrifuð kl. 07:22

Tölvugerð mynd af Spike S-512 (fyrir ofan) og hljóðfráa þotan frá Boom Technology (fyrir neðan)

Áætlað er að tvær hljóðfráar tilraunaþotur frá sitthvoru fyrirtækinu muni hefja prófanir og undirbúning á þessu ári fyrir sitt fyrsta flug en nokkur fyrirtæki í heiminum hafa sl. misseri lýst því yfir að verið sé að þróa flugvél sem á að geta flogið á hraða hljóðsins líkt og Concorde-þotan gerði forðum daga.

Annar framleiðandinn er fyrirtækið Boom Technology í Colorado sem hefur nú þegar lokið við tilraunir í vindgöngum með líkan af hljóðfrárri þotu og er verið að safna gögnum úr þeim prófunum til að hefja framleiðslu á prótótýpu í fullri stærð fyrir lok þessa árs.

Boom Technology var stofnað árið 2014 í kjallara á heimili stofnandans, Blake School, sem er einkaflugmaður og forritari sem hefur m.a. starfað fyrir Amazon.com en hann hafði enga reynslu af flugvélasmíði þar til hann fór að afla sér upplýsinga úr fjölda bóka auk þess sem hann ræddi við ótal sérfræðinga í flugvélasmíði áður en hann tók stóra skrefið.

Blake stofnaði loks Boom Technology en þar starfa í dag á annan tug starfsmanna og þar á meðal verkfræðingar sem áður störfuðu hjá fyrirtækjum á borð við Pratt & Whitney, NASA, Lockheed Martin og Northrop Grumman.

Tölvugerð mynd af hljóðfráu þotunni sem Boom Technology vinnur að á Heathrow-flugvellinum

Boom tilkynnti í fyrra að til stæði að smíða hljóðfrá farþegaþotu sem myndi taka 45 farþega og flogið á hraðanum Mach 2.2 sem er meira en tvöfaldur hljóðhraði.

Hönnunin miðar af því að „kæfa“ niður þann hávaða sem fylgir því er flugvél rífur hljóðmúrinn en Boom Technology telur mikla eftirspurn vera eftir hljóðfráu farþegaflugi á sambærilegu verði og farþegar greiða fyrir Business Class farrými.

S-512 þotan sem Spike Aerospace vinnur að

Á sama tíma er annar framleiðandi einnig með sambærilega þotu í bígerð sem er Spike Aerospace í Boston í Massachusetts en þar á bæ er verið að leggja lokahönd á líkan af Spike S-512 sem verður einkaþota en nokkrar tilraunavélar verða smíðaðar af þeirr vél og er stefnt á jómfrúarflugið árið 2018.

Spike S-512 verður einnig hönnuð sérstaklega til að geta rofið hljóðmúrinn án tilheyrandi hávaða sem takmarkar notkun fyrir slíku flugi yfir byggð en þess má geta að Concorde-þotan mátti ekki hefja hljóðfrátt flug fyrr en hún var komin yfir hafið en í dag er mega aðeins herþotur rjúfa hljóðmúrinn í Bandaríkjunum og í Evrópu.