Kanaríeyjar vilja koma á flugi milli Íslands og Fuerteventura

- 20 milljónir í „hvatningarstyrk“ fyrir flug frá Keflavík til FUE

24. apríl 2017

|

Frétt skrifuð kl. 08:27

Fuerteventura er 2. stærsta eyja Kanaríeyja

Ferðamálaráð Kanaríeyja hefur óskað eftir umsóknum fyrir hvatningarstyrk til áætlunarflugs á 24 nýjum flugleiðum milli Kanaríeyja og Evrópu og Ameríku en á listanum er óskað eftir umsóknum um áætlunarflug frá Keflavíkurflugvelli til Fuerteventura.

Það er flugþróunarsjóðurinn (Flight Development Fund) í Las Palmas sem stendur fyrir verkefninu en markmiðið er plægja akurinn og kynna fyrir flugfélögum mögulegar flugleiðir sem vert er að huga að þar sem eftirspurn er fyrir beinum flugsamgöngum auk þess sem aðrir þættir spila inn í sem ferðamálaráð á eyjunnum hafa gert könnun á.

Flight Development Fund (FDF) þarfagreinir ferðamannamarkaðinn á Kanaríeyjum með tilliti til eftirspurnar og er reiknað út hvaða flugsamgöngur myndu vera arðbærar þar sem ekki eru fyrir beinar flugsamgöngur í dag og þá er fylgst með dreifingu ferðamanna um eyjarnar og skoðað frá hvaða löndum þeir eru.

15 lönd eru á listanum að þessu sinni og er Ísland þar á meðal en 20 milljónir úthlutast í styrk fyrir nýrri flugleið milli Reykjavíkur og Fuerteventura sem viðkomandi flugfélag fær í sinn hlut til að fjármagna það ferli sem fer í að koma flugleiðinnni á laggirnar fyrstu 2 árin.

Fuerteventura er önnur stærsta eyja Kanaríeyja en ekkert beint flug er í dag milli Íslands og eyjunnar en Icelandair, WOW air og Primera Air fljúga hinsvegar öll til Tenerife og til Las Palmas.

„Við vonumst til að þetta verði hvatning fyrir þau flugfélög sem eru að íhuga að auka umsvif sín til Kanaríeyja“, segir í tilkynningu frá FDF.

Frestur til að skila inn tilboði fyrir flugi frá Íslandi til Fuerteventura rennur út þann 4. maí næstkomandi

Flight Development Fund sjóðinn var komið á fót árið 2014 eftir mikla vinnu og samninga milli Kanaríeyja og Evrópusambandsins sem gerði miklar undanþágur á reglugerðum í flugmálum fyrir eyjarnar þar sem landfræðileg lega þess er frekar afskekkt frá meginlandinu.

Með sjóðnum fá Kanaríeyjar leyfi til að hvetja flugfélög til að hefja nýjar flugleiðir til eyjanna og þá var takmörkun um fjölda flugferða afnumin í kjölfarið.

Frá stofnun sjóðsins árið 2014 hefur tekið að koma á 18 nýjum áætlunarflugferðum milli Kanaríeyja og evrópskra áfangastaða með þessu fyrirkomulagi.

Frá flugvellinum á Fuerteventura

Þá er spænski flugrekstaraðilinn AENA í sífelldu sambandi við ríkisstjórn Spánar um ýmis mál á borð við lækkun flugvallarskatta á Kanaríeyjum með tilliti til hversu langt flugfélög þurfa að fljúga þangað frá Evrópu.

Flugvöllurinn á Fuerteventura er 2. stærsti flugvöllurinn á Kanaríeyjum er kemur að fjölda flugfélaga en þangað fljúga 62 flugfélög en sá stærsti er flugvöllinn á Gran Canaria sem tekur við 72 flugfélögum, Tenerife Reina Sofia (TFS) er í 3. sæti með 55 flugfélög og Lanzarote í 4. sæti með 27 flugfélög.