Tvöfalt fleiri slösuðust í ókyrrð í fyrra í farþegaflugi vestanhafs

24. apríl 2017

|

Frétt skrifuð kl. 13:56

Það er alltaf best að hafa beltin spennt meðan setið er

Tvöfalt fleiri slys urðu á fólki um borð í farþegaflugi vegna ókyrrðar í lofti árið 2016 samanborðið við árið á undan samkvæmt nýrri tilkynningu frá bandarískum flugmálayfirvöldum (FAA).

Árið 2016 voru 44 sem slösuðust í ókyrrð í farþegaflugi vestanhafs en árið 2015 var 21 sem varð fyrir meiðslum vegna ókyrrðar.

Fæstir slösuðust árið 2006 þegar tólf hlutu meiðsl í ókyrrð en það mesta sem hefur mælst var árið 2009 þegar 117 slösuðust.

Í flestum tilvikum eru það farþegar sem slasast frekar en áhafnir en í fyrra var 3/4 af þeim sem slösuðust, farþegar um borð sem endurspeglar nauðsyn þess að hafa sætisólar spenntar meðan setið er.

Farþegarýmið getur verið hættulegur vinnustaður fyrir flugfreyjur og flugþjóna og þá sérstaklega þegar flogið er inn í heiðkviku sem á ensku nefnist „clear air turbulence“ en slík tegund ókyrrðar er þó ekki algeng.

Þegar vélar fljúga inn í slíka ókyrrð kemur högg á þær með þeim afleiðingum að lauslegir hlutir kastast um vélina og farþegar geti orðið fyrir þeim en afar erfitt er að sjá slík veðrabrigði fyrir þegar flogið er yfir skýjunum og þar af leiðandi kemur þetta flugmönnum iðulega að óvörum þar sem fyrirbærið sést ekki á radar vélanna.

Brunasár og brákaður hryggjaliður eftir ókyrrð

Þann 13. desember flaug flugvél frá jetBlue inn í skyndilega ókyrrð í námunda við fjöllinn í nágrenni Denver sem varð til þess að flugfreyja um borð í vélinni kastaðist upp í loftið og féll niður og rakst með andlitið í borð í eldhúsrými vélarinnar með þeim afleiðingum að hún brákaðist í andliti.

Mikil ókyrrð reið yfir aðra flugvél frá jetBlue þann 11. ágúst í fyrra sem varð til þess að þrír í áhöfn og 24 farþegar slösuðust í vél sem var á leið frá Boston til Sacramento og þurfti vélin að lenda í Rapid City í South Dakota.

Þá endaði einn farþegi með brákaðan hryggjarlið eftir „clear air turbulence“ ókyrrð um borð í vél American Airlines í ágúst í fyrra sem var á leið til Cayman-eyja og mánuði á undan flaug flugvél frá jetBlue gegn um svipaða ókyrrð á leið til Barbados á meðan flugfreyja var að bera pott með sjóðandi heitu vatni sem hún fékk yfir sig með þeim afleiðingum að hún hlaut brunasár.

Þann 26. júlí í fyrra fótbrotnaði flugfreyja sem datt í eldhúsrými á Embraer-þotu frá United Express sem flaug í gegnum skyndilega ókyrrð í að flugi að flugvellinum í Cleveland.