Málmþreyta talin orsök sprengingar í hreyfli

- Kona sem sogaðist út um glugga lést af sárum sínum

18. apríl 2018

|

Frétt skrifuð kl. 16:12

Starfsmenn samgönguöryggisnefndar Bandaríkjanna (NTSB) á vettvangi á flugvellinum í Philadelphia

Talið er að málmþreyta í hreyflablaði hafi orsakað sprengingu í CFM56 hreyfli á Boeing 737-700 þotu Southwest Airlines í gær er þotan var í 32.500 fetum yfir Pennsylvaníu á leið frá New York til Dallas.

Í tilkynningu frá samgönguöryggisnefnd Bandaríkjanna (NTSB) kemur fram að frumskoðun á hreyflinu hafi leitt í ljós að hreyflablað númer 13 hafi losnað úr festingu vegna málmþreytu í blaðinu.

Southwest Airlines hefur ákveðið að skoða hreyflablöð í öllum CFM56 hreyflunum á Boeing 737 flota félagsins í kjölfar niðurstöðu NTSB en rannsókn á atvikinu í gær er hvergi nærri lokið.

Þetta er í annað sinn sem málmþreyta í hreyflablaði á CFM56-7B hreyfli veldur sprengingu í hreyfli á Boeing 737 þotu Southwest Airlines en sambærilegt atvik átti sér stað á þotu sömu gerðar hjá félaginu í 30.700 feta hæð er vélin var á leiðinni frá New Orleans til Orlando í ágúst árið 2016 en engann sakaði í því atviki.

Starfsmenn NTSB að störfum við hreyfilinn sem sprakk

Í kjölfar þess gáfu bandarísk flugmálayfirvöld (FAA) út yfirlýsingu í fyrra þar sem farið var fram á að skoðun færi fram á tilteknum CFM56 hreyflum í þeim tilgangi að leita eftir málmþreytu í hreyflablöðum en ekki er vitað hvort að tilskipunin hafi náð til þess hreyfils sem sprakk í gær.

Flugslysasérfræðingar frá Frakklandi hafa verið sendir til Bandaríkjanna þar sem CFM56 hreyfillinn er framleiddur af CFM International sem er að hluta til í eigu franska fyrirtækisins Safran.

Konan sem lést í gær hét Jennifer Riordan

CFM56-7B hreyfillinn er einn vinsælasti þotuhreyfill heims en hann má finna á yfir 6.700 farþegaþotum um allan heim og hefur öryggissaga hans verið mjög góð frá því hann kom á markaðinn árið 1997.

Sprengingin varð til þess að brak skaust í skrokk vélarinnar og gerði gat á gluggann með þeim afleiðingum að hann fór úr falsinu.

Kona sem sat við gluggann sogaðist út um gluggaopið og far föst í falsinu vegna þrýstingsmunarins auk þess sem hún slasaðist af braki sem skaust inn um gluggann.

Samkvæmt einum farþega um borð í vélinni þá kom karlmaður henni til hjálpar og greip konuna og reyndi að toga hana frá glugganum og inn í vélina en sogið var það mikið að það hafðist ekki fyrr en annar farþegi hljóp til og aðstoðaði hann.

Konan var flutt á sjúkrahús við lendingu í Philadelphia en lést skömmu síðar af sárum sínum. Hún hét Jennifer Riordan og starfaði við almannatengsl í Well Fargo

Jennifer var 43 ára, gift og tveggja barna móðir og búsett í Albuquerque í Nýju-Mexíkó. Sjö aðrir farþegar slösuðust en þeir hlutu minnihlutar áverka.

Talið er að rannsóknin á atvikinu gæti tekið 12 til 15 mánuði.