Riftun á kjarnorkusamkomulagi byr undir vængi Sukhoi

16. júlí 2018

|

Frétt skrifuð kl. 14:22

Sukhoi Superjet 100 þotan

Ákvörðun Bandaríkjanna um að draga til baka kjarnorkusamkomulagið sem gert var við Írani er vatn á myllu rússneska flugvélaframleiðandans Sukhoi.

Evrópskum fyrirtækjum er enn frjálst að standa við kjarnorkusamkomulagið sem gert var til að aflétta viðskiptabanni við Íran en þar sem viðskiptatengsl milli evrópskra framleiðanda og vestrænna birgja er flókið ferli er kemur að samkomulaginu þá eru ekki öll fyrirtæki sem ætla taka áhættuna á því að afhenda flugvélar til Íran og þar á meðal ATR framleiðandinn.

Rússar eru einnig aðili að samkomulagi um viðskiptaþvinganir á lönd á borð við Íran og Norður-Kóreu en það gildir þó ekki um Sukhoi Superjet 100 þar sem framleiðslan á þeirri þotu er af öðru tagi og nær ekki til samkomulagsins.

Bandaríkin gáfu evrópskum fyrirtækjum frest upp á nokkra mánuði til þess að ljúka afhendingum á þeim vörum sem búið væri að semja um sölu á til Írans en Airbus sagði að það væri of stuttur tími fyrir flugvélaframleiðendur og sé því óséð hvort að Airbus geti afhent fleiri þotur til Írans.

Iran Air gerði samkomulag við Airbus í desember árið 2016 um kaup á yfir 100 nýju farþegaþotum og er auðséð að ekki næst að afhenda þær þotur til flugfélaga í Íran og þá hefur Boeing lýst því yfir að framleiðandinn hefur misst leyfið til þess að selja þotur til landsins.

Embraer, Bombardier og Comac heyra einnig undir samkomulag Bandaríkjanna þar sem allar þær þotur eru samsettar úr íhlutum sem framleiddir eru í Bandaríkjunum og er hlutfallið yfir þau mörk sem leyfilegt er samkvæmt samkomulaginu.

Þetta gerir það að verkum að Sukhoi Superjet 100 þotan er eina farþegaþotan á markaðnum sem írönsk flugfélög geta fest kaup á til þess að endurnýja flugflotann sinn eftir að kjarnorkusamkomulagið var afturkallað.

Svo gæti farið að Íranir myndu panta allt að 100 þotur frá Sukhoi sem yrði nóg til þess að mæta eftirspurninni bæði í innanlandsflugi og millilandaflugi.

Iran Aseman Airlines hefur nú þegar pantað tuttugu Sukhoi Superjet 100 þotur og þá hefur Iran Air Tours einnig pantað tuttugu þotur en þær pantanir bárust áður en Bandaríkjastjórn afturkallaði samkomulagið í maí í vor.