Boeing mun aðstoða Antonov við að hefja flugvélasmíði á ný

- Geta hafið smíði á Antonov-flugvélum á ný án aðstoðar frá Rússum

28. júlí 2018

|

Frétt skrifuð kl. 12:52

Antonov er þekktar fyrir að hafa smíðað stærstu flugvél heims sem er Antonov An-225 (Mriya)

Boeing mun koma Úkraínu til hjálpar og aðstoða Antonvo við að endurvekja flugvélaframleiðsluna sem hefur legið niðri í tæp fjögur ár.

Framleiðsla á Antonov-flugvélum leið undir lok árið 2014 í kjölfar stríðsástandsins sem braust út á Krímskaga milli Úkraínumanna og Rússa árið 2014 en við það slitnaði upp úr samstarfi þjóðanna.

Framleiðslan á Antonov-þotunum var mjög háð innflutning á íhlutum frá Rússlandi til Úkraínu en allt stefnir í að framleiðslan muni hefjast að nýju með aðstoð frá dótturfélagi Boeing.

Fyrirtækið Aviall hefur staðfest að samningur hafi verið undirritaður á Farnborough-flugsýningunni í seinustu viku um þjónustuaðstoð og samstarf varðandi íhluti og varahluti frá Boeing svo hægt verði að smíða allt að átta Antonov-þotur á ári.

Oleksandr Donets, forstjóri Antonov, hefur staðfest þetta og segir að næstu skref séu að reisa vöruskemmu með dótturfélagi Boeing þar sem hægt verður að hýsa tæki og tól ásamt íhlutum fyrir framleiðsluna.

Antonov An-124 fraktþota Volga-Dnepr

„Þetta vöruhús mun sjá um að annast íhluti, hráefni, bæði málm og önnur efni og er um að ræða þá hluti sem við getum ekki nálgast lengur frá fyrrum samstarfsaðilum í Rússlandi“, segir Donets sem tekur fram að Aviall muni fjármagna framkvæmdirnar á vöruhúsinu.

Hinumegin við landamærin, í Rússlandi, eru einnig áform uppi um að hefja framleiðslu að nýju á Antonov An-124 fraktflugvélinni en Rússar hafa sagt að þeir geti vel smíðað þá þotu án aðkomu Úkraínumanna og telja Rússar að þeir þurfi ekki einkaleyfi til þess þar sem þeir komu að framleiðslunni í samstarfi við Úkraínu.

Rússnesku flugvélaverksmiðjurnar United Aircraft Corporation (UAC) sögðu í júní að mikil eftirspurn væri eftir stórum fraktþotum á borð við An-124 og ætlar Rússar að framleiða hana á eigin spýtur og breyta um nafn á vélinni.

Antonov var stofnað árið 1946 á tímum Sovíetríkjanna og hefur framleiðandinn framleitt um 30 mismunandi tegundir af flugvélum í samstarfi við Rússa.

Antonov áætlar að fjöldaframleiðsla verði komin á fullt skrið fyrir árslok 2019 og stendur til að smíða aftur Antonov An-148, An-158 og An-178 og mun dótturfélag Boeing fá einkarétt á þjónustuaðstöð Antonov við framleiðsluna.