Atvikið getur haft afleiðingar á flugöryggi með nýjum reglum

- Erfitt að koma í veg fyrir atvik er starfsmaður stenst bakgrunnsskoðun

13. ágúst 2018

|

Frétt skrifuð kl. 11:08

Mögulegt er að atvikið sl. laugardag eigi eftir að hafa áhrif á öryggismál á flugvöllum og sérsaklega er snýr að eftirliti með starfsfólki

Sérfræðingar í flugmálum telja að atvikið sem átti sér stað í Seattle sl. laugardag, er Richard Russell, starfsmaður frá Horizon Air, stal Bombardier Q400 flugvél og flaug henni í meira en klukkustund áður en hún brotlenti, eigi sennilega eftir að hafa áhrif um allan heim er kemur að öryggismálum í fluginu og ráðningum á starfsfólki á flugvöllum.

Algengt er að flugiðnaðurinn bregðist við og herði öryggi og eftirlit í kjölfar flugslysa og þá er oft sem eitt atvik getur orðið til þess að nýjar reglur eru kynntar til sögunnar sem getur bæði gert farþegum erfiðara fyrir að ferðast og starfsumhverfið erfiðara fyrir flugmenn og þá sem starfa við flugið.

The Seattle Times hefur greint frá því að stjórn Seattle-Tacoma flugvallarins, Alaska Airlines og Horizon Air stefnir á að hittast á næstunni og ræða afleiðingarnar sem atvikið mun hafa og verður rætt um hvort að breytingar verði gerðar á öryggismálum.

Jeff Price, sérfræðingur og ráðgjafi í flugmálum, telur að hverjar sem breytingarnar gætu orðið þá eigi þær eftir að hafa stór áhrif á daglegan rekstur flugvalla.

Starfsmenn Horizon Air við Q400 flugvél

„Hérna var um að ræða starfsmann sem hafði aðgang að flugvél og leyfi til þess að færa hana á milli staða á flugvellinum og hafði hann auk þess kunnáttu til þess að setja hana í gang og fljúga henni“, segir Erroll Southers, fyrrum starfsmaður FBI og sérfræðingur í samgönguöryggismálum, sem nefnir að stærsta ógnin í öryggismálum í flugheiminum kemur innan frá.

Atvikið vekur upp spurningar um öryggi á flugvöllum er kemur að starfsmönnum og ráðningu þeirra og hversu takmarkað það er að koma í veg fyrir að starfsmaður sem starfar í kringum flugvélar á flugvöllum brjóti af sér með einhverjum hætti þegar viðkomandi hefur þegar staðist bakgrunnsskoðun.

„Það eru aðferðir sem notaðar eru til þess að koma í veg fyrir atburð sem þennan í ráðningarferlinu og þar á meðal eru sálfræðipróf notuð en þau eru langt í frá að vera gallalaus“, segir Price.

Yfirmenn Horiozin Air hafa greint frá því að bakgrunnsskoðun hafi verið gerð á sínum tíma er Russell var ráðinn til starfa og ekki sé vitað til þess að hann hafi sótt flugnám eða verið með flugmannsskírteini.

Brad Tilden, framkvæmdarstjóri Alaska Airlines, segir að of snemmt sé að segja til um hvaða afleiðingar atvikið eigi eftir að hafa í för með sér hjá fyrirtækinu.