Fékk að skoða forsetaflugvél Pútíns á aðfangadag

- Pútin bauð unglingspilti með sjaldgæfan sjúkdóm að skoða forsetaflugvélina

26. desember 2018

|

Frétt skrifuð kl. 15:52

Arslan Kaipkulov myndar skrifborð Rússlandsforseta um borð í Ilyushin Il-96-300 forsetaflugvélinni

Arslan Kaipkulov er 15 ára strákur frá Rússlandi sem hefur haft mikinn áhuga á flugvélum en draumur hans hefur þó lengi verið að fá að skoða og gera myndband um forsetaflugvél Rússlandsforseta sem er af gerðinni Ilyushin Il-96-300.

Arslan berst við illvígan sjúkdóm og frétti Pútin af áhuga stráksins fyrir forsetaflugvélinni er hann var viðstaddur International Volunteer Forum ráðstefnuna sem fram fór í byrjun desember í Moskvu.

Þar kynntist Pútín „Dream with Me“ verkefninu þar sem langveik börn og unglingar deila draumum sínum og segja frá óskum sínum en þegar Pútín heyrði af áhuga Arslan fyrir forsetavélinni þá ákvað Rússlandsforseti að verða við því.

Arslan og móður hans fengu boð um að koma til Moskvu yfir jólin og mættu þau á aðfangadag og fengu einkaleiðsögn um forsetaþotu Pútíns og Arslan fékk að mynda þotuna hátt og lágt en Arslan, sem er frá Bashkir-héraðinu, kemur reglulega til Moskvu til að gangast undir læknismeðferð.

Arslan hefur mikinn áhuga á flugvélum og lengi haft sérstakan áhuga á forsetaflugvélinni

„Þessi þota er hernaðarleyndamál landsins svo það er mikil heiður fyrir mig að fá að koma og skoða hana“, segir Arslan sem tekur fram að draumur hans hafi orðið að veruleika.

Arslan hefur mjög sjaldgæfan sjúkdóm en hann hefur ekkert ónæmiskerfi og lætur hann það ekki stöðva sig í að lifa lífinu til fulls og stundar hann nám í ensku og fjölmiðlun.

Arslan segir að stjórnklefi þotunnar hafi heillað hann mest þótt að fundarherbergið um borð og öll þægindin hafi einnig komið honum á óvart

„Ég fékk að sitja í flugstjórasætinu og einnig sýndu þeir mér aðra staði um borð í flugvélinni en þar mátti ég hinsvegar alls ekki taka myndir“, segir Arslan.

Pútín komst að áhuga Arslan fyrir forsetaflugvélinni er hann var viðstaddur International Volunteer Forum ráðstefnuna í Moskvu fyrr í þessum mánuði

Þá fékk Arslan og móðir hans einnig að skoða Vnukovo-flugvöllinn í Moskvu og var þeim sagt frá öryggismálum flugvallarins og fengu þau að skoða ýmsa staði á flugvellinum sem farþegar og almenningur fá vanalega ekki að berja augum.

Pútín leysti Arslan út með gjöf og gaf honum myndbandstökuvél og hefur strákurinn þegar gert handritið að stuttri heimildarmynd um forsetavélina sem verður 25 mínútur á lengd.

Arslan hefur mikinn áhuga á flugi og flýgur mikið í flughermum í tölvunni sinni.

Fleiri myndir: