Engin pressa á Airbus að bregðast við Boeing 797

- „Við þurfum ekki að fylla upp í neitt gat hjá okkur“

21. janúar 2019

|

Frétt skrifuð kl. 18:08

Guillaume Faury, forstjóri yfir farþegaþotudeild Airbus

Airbus segir að ekki standi til að bregðast við fyrirhugaðri nýrri þotu sem Boeing ætlar sér að koma með á markaðinn sem fengið hefur vinnsluheitið Boeing 797.

Guillaume Faury, forstjóri yfir farþegaþotudeild Airbus, segir að Boeing 797 sé einingis hugmynd hjá Boeing og er enn ekki komin staðfesting á að sú þota fari í framleiðslu og sé sú þota svar Boeing við markaði sem er nú þegar stjórnað af Airbus.

Síðastliðin ár hefur verið rætt um „gat“ sem myndaðist eftir að hætt var að framleiða Boeing 757 þar sem engin þota er framleidd í dag sem brúar bilið frá Boeing 737 MAX 10 upp í minnstu útgáfuna af Dreamliner-þotunni, Boeing 787-8.

Airbus vill meina að vinsældir Airbus A321neo endurspegli að Airbus hafi náð að fylla í gatið þar sem mörg flugfélög, sem hafa haft Boeing 757 í flota sínum, hafa pantað A321neo eða langdrægu útgáfuna, Airbus A321LR.

A321LR tilraunarþota Airbus

„Staðan er sú að þeir hafa tapað þessum markaði þar sem þeir hafa ekki lengur réttu vöruna. Þeir telja sig þurfa að gera eitthvað í málunum og bregðast við því með nýrri flugvél og það er þeirra að taka næsta skref“, segir Faury.

Boeing hefur hinsvegar aðra sýn á málinu þar sem stjórn Boeing sér fram á þörf fyrir nýja farþegaþotu með sætum fyrir 200 til 270 farþega með flugdrægi upp á 5.000 nm (9.300 kílómetra) en Boeing sagði í fyrra að árið 2019 verði tekin ákvörðun um hvort að ný farþegaþota verður að veruleika.

Boeing hafði yfirráð yfir markaðnum í mörg ár með Boeing 757

Boeing átti markaðinn í mörg ár með Boeing 757 ásamt stærri þotunni, Boeing 767, en báðar þoturnar eru enn vinsælar meðal flugfélaga en vegna aldurs vélanna þá neyðast flugfélögin til þess að skipta þeim út fyrir nýjar og sparneytnari þotur með hagkvæmari hreyflum.

Hvað varðar Boeing 767 þá hafa flest flugfélög annaðhvort skipt yfir í Dreamliner en einnig hafa sum pantað Airbus A330 og einnig A330neo.

Framleiðslu á Boeing 757 var hætt árið 2004

Er kemur að staðgengli fyrir Boeing 757 þá hafa flugfélög þurft að leysa þá þotu af hólmi með Airbus A321neo þrátt fyrir að Boeing telur að Boeing 737 MAX geti flogið yfir 90% af öllum þeim flugleiðum í heiminum sem hafa verið farnar með Boeing 757.

Airbus er einnig að skoða hugmyndir með að koma með enn langdrægari útgáfu af Airbus A321LR sem nefnist A321LRX en Faury vill ekki gefa upp neinar upplýsingar varðandi þá þotu.

„Við höfum ekkert gat til þess að fylla í þar sem það úrval flugvéla sem við höfum upp á að bjóða ná yfir alla þá flugdrægni sem flugfélögin þurfa. Þessvegna þurfum við ekkert að bregðast við útspili frá Boeing. Við munum bara bíða og sjá hvað gerist“, segir Faury.