Samgönguráðuneyti ætlar að rannsaka vottun FAA á 737 MAX

19. mars 2019

|

Frétt skrifuð kl. 08:39

Peter DeFazio segir að samgönguráðuneyti Bandaríkjanna ætli að rannsaka vottunarferil FAA varðandi Boeing 737 MAX þoturnar

Samgönguráðuneyti Bandaríkjanna ætlar sér að hefja rannsókn á starfsemi bandarískra flugmálayfirvalda (FAA) er kemur að vottunarferlinu sem fram fór á sínum tíma er Boeing 737 MAX þotan kom á markaðinn.

Aukinn þrýstingur er komin á bandarísk stjórnvöld til þess að greina frá því hvernig hið svokallað MCAS-kerfi Boeing 737 MAX þotunnar var samþykkt og Boeing leyft að hefja afhendingar á þotunum ef svo reynist rétt að fullnægjandi vottun hafi ekki farið fram á kerfinu sem var sérstaklega hannað fyrir Boeing 737 MAX.

Fjölmiðillinn The Seattle Times dró í gær upp dökka mynd af Boeing og greindi frá því að framleiðandanum hafi verið það mikið í mun að koma Boeing 737 MAX sem fyrst á markað til að ná að etja kappi við A320neo, samkeppnisþotuna frá Airbus, að flugmálayfirvöld vestanhafs hafi sofnað á verðinum varðandi vottun á MCAS-kerfinu sem talið er að hafi orsakað bæði flugslysin með Boeing 737 MAX.

Samgönguráðuneyti Bandaríkjanna segir að útibú FAA í Seattle sé ábyrgt fyrir vottun á nýjum þotum frá Boeing og þá sé annað útibú sem sjái um að votta þjálfun flugmanna og þjálfunaraðferðir fyrir nýjar þotur.

Boeing 737 í samsetningu í verksmiðjum Boeing í Renton

Samgönguráðuneytið hefur beðið alla starfsmenn í útíbúi FAA í Seattle að varðveita og halda til haga öllum gögnum og tölvupóstum er varða vottunarferli Boeing 737 MAX þotnanna en talið er að Boeing og FAA hafi verið í of nánu samstarfi varðandi innleiðingu þotunnar á markaðinn á sínum tíma sem hafi orsakað skerta vottun á kerfi sem hefði þurft að gangast í gegnum mun ítarlegri úttekt að sögn The Seattle Times.

Þá segir Peter DeFazio, formaður samgönguráðs innan ráðuneytisins og þingmaður repúblíkana í Oregon, að til standi að hefja áheyrnir fyrir dómi varðandi það hvernig Boeing 737 MAX fékk leyfi til þess að vera fullvottuð ef svo reynist rétt að MCAS-kerfið hafi ekki verið fullvottað og hversvegna það var ekki hluti af þjálfun flugmanna frá upphafi.

Ekki eru þó allir sammála DeFazio en þingmaðurinn Sam Graves segir að Boeing 737 MAX sé fullkomnlega örugg flugvél og telur hann frekar að flugmenn þotunnar, sem fórst hjá Ethiopian Airlines, hafi ekki haft næga þjálfun á flugvélina er kemur að því að aftengja MCAS kerfið.