Breytingar á flugáætlun Icelandair

- Gert ráð fyrir að Boeing 737 MAX verði kyrrsett fram til 16. júní

10. apríl 2019

|

Frétt skrifuð kl. 11:07

„Jökulsárlón“, Boeing 737 MAX þota Icelandair

Icelandair hefur tilkynnt um breytingar á leiðarkerfi félagsins sem meðal annars má rekja til kyrrsetningar á Boeing 737 MAX þotum félagsins en á föstudag verður kominn einn mánuður frá því Boeing 737 MAX var kyrrsett.

Í tilkynningu Icelandair kemur fram að kyrrsetning Boeing 737 MAX mun vara fram til 16. júní og segir að með þeim aðgerðum sem gripið var til með því að bæta leiguvélum í flotann hafi tekist að lágmarka þau áhrif sem kyrrsetningin hefði annars haft.

Frá 1. apríl til 15. júní mun Icelandair fella niður 3,6% af flugferðum félagsins sem samsvarar 100 flugferðum á því tímabili en í flestum tilfellum er um að ræða flug til áfangastaða þar sem fleiri en eitt flug eru í boði sama dag.

Þrátt fyrir þessar ráðstafanir helst sætaframboð félagsins nánast óbreytt þar sem notast verður við Boeing 767 flugvélar sem eru stærri en Boeing 737 MAX vélarnar. Af þeim sökum er gert ráð fyrir óverulegum áhrifum á heildarfjölda fluttra farþega á tímabilinu.

Icelandair ákvað einnig að hætta flugi til Cleveland í Ohio og til Halifax í Kanada sem áður hefur verið tilkynnt sem má rekja til kyrrsetningar Boeing 737 MAX.

Farþegarýmið um borð í TF-ICE

Þá kemur fram að ekki sé vitað hver fjárhagsleg staða sé vegna áhrifa af kyrrsetningu flugvélanna þar sem að ekki liggur fyrir hversu mikið af þeim kostnaði sem hlýst af kyrrsetningunni fæst bættur frá framleiðanda.

Bæta við vélum og fjölga flugferðum til Alicante og Kanarí

Vegna breytinga á samkeppnisumhverfinu mun Icelandair auka við framboð sitt í flugi til Suður-Evrópu frá því sem áður var ákveðið. Félagið hefur nú þegar bætt við framboði til Alicante og mun, í samstarfi við VITA, bjóða flug þangað þrisvar sinnum í viku í sumar.

Ennfremur, hefur félagið hafið vinnu sem miðar að því að bæta vélum við flugvélaflota Icelandair sem einungis eru útbúnar almennu farrými. Mun fleiri sæti verða í þessum vélum en í núverandi vélum félagsins sem lækkar kostnað á hvert framboðið sæti og styrkir þ.a.l. samkeppnishæfni félagsins á þessum markaði.

Þessar vélar henta betur í flug til áfangastaða sem eru ekki hluti af kjarnaleiðarkerfi Icelandair, t.d. Alicante og Tenerife, og skapa því tækifæri til frekari vaxtar. Gert er ráð fyrir að fyrstu vélarnar með þessari uppsetningu verði komnar í rekstur í byrjun árs 2020.