Tvö ókeypis námskeið hefjast í næstu viku hjá Keili

- Námskeið fyrir ungt fólk um flugtengd störf og kynning á flugnámi

18. júlí 2019

|

Frétt skrifuð kl. 15:57

Fyrra námskeiðið hefst 22. júlí og stendur yfir í fimm daga og það síðara hefst 29. júlí og stendur yfir í þrjá daga

Í næstu viku munu tvö námskeið hefjast á vegum Flugakademíu Keilis, annars vegar grunnnámskeið um einka- og atvinnuflugnám og hinsvegar námskeið fyrir ungt fólk um flugtengd störf en bæði námskeiðin eru ókeypis.

Grunnnámskeið um einka- og atvinnuflugnám

Fyrra námskeiðið, Grunnámskeið um einka- og atvinnuflugnám, hefst þann 22. júlí og er um 5 daga námskeið að ræða, ætlað fullorðnum einstaklingum á aldrinum 18 ára og eldri og fá þátttakendur að kynnast tækifærum og námi til einkaflugs og atvinnuflugs.

Á námskeiðinu verður farið yfir fyrirkomulag og skipulag einka- og atvinnuflugnáms, sem og þau tækifæri sem felast í flugtengdum störfum. Þátttakendur kynnast flugnámi frá upphafi til enda, tegundaáritun flugmanna og vinnu í flughermum, sem og öðrum tengdum starfsstéttum bæði beinum og afleiddum flugstörfum. 

Flugnemar í aðflugi að flugvellinum á Ísafirði

Um er að ræða greinargott og innihaldsríkt grunnnámskeið um flug, sem er ætlað að vekja áhuga fólks á námi og tækifærum í flugi og flugtengdum greinum bæði hérlendis og erlendis. 

Athygli skal vakin á því að námskeiðið höfðar jafn vel til beggja kynja og fer námskeiðið fram í aðalbyggingu Keilis á Ásbrú í Reykjanesbæ. Auk þess verður farið í vettvangsferðir og heimsóknir til fyrirtækja.

Þess ber að geta að námskeiðið veitir engin réttindi, en allir þátttakendur fá viðurkenningarskjal fyrir að hafa lokið námskeiðinu þar sem fram kemur ítarleg lýsing á innihaldi þess.

Nánari upplýsingar um Grunnnámskeið um einka- og atvinnuflug

Flugtengd störf - Námskeið fyrir ungt fólk

Námskeið um flugtengd störf er ætlað ungu fólki á aldrinum 13 - 16 ára sem vilja kynnast námi, starfi og tækifærum á öllu því sem flugrekstur hefur upp á að bjóða, allt frá atvinnuflugi yfir í flugtengd störf á jörðu niðri. 

Á námskeiðinu verður farið yfir allt það sem snýr að flugrekstri í víðu samhengi. Þátttakendur fá meðal annars að kynnast flugnámi frá upphafi til enda, tegundaáritun flugmanna, vinnu í flughermum, námi og starfi flugvirkja, starfi flugþjóna, afgreiðslufólks á flugvöllum og flugumsjónarmanna, flugvallarstarfsmanna, flugumferðarstjóra, tækni og rekstrarhlið flugrekstrar og öðrum tengdum starfsstéttum bæði beinum og afleiddum flugstörfum.

Um er að ræða skemmtilegt námskeið sem er ætlað að vekja áhuga ungs fólks á flugtengdum störfum og námi þeim tengdum. Markmiðið er að þátttakendur fái dýpri sýn á störf og nám þeirra starfsstétta sem sem starfa í flugtengdum greinum og þau fjölbreyttu tækifæri sem flugtengdar greinar geta skapað bæði hérlendis og erlendis. Athygli skal vakin á því að námskeiðið höfðar jafn vel til stúlkna sem drengja.

Námskeiðið fer fram í aðalbyggingu Keilis á Ásbrú í Reykjanesbæ og að auki verður farið í vettvangsferðir og heimsóknir til fyrirtækja.

Þess ber að geta að námskeiðið veitir engin réttindi, en allir þátttakendur fá viðurkenningarskjal fyrir að hafa lokið námskeiðinu þar sem fram kemur ítarleg lýsing á innihaldi þess.

Nánari upplýsingar um námskeiðið: Flugtengd störf - Námskeið fyrir ungt fólk