Bannað að sitja í aftustu sætaröð í A320neo þotum Lufthansa

- Framfylgja tilmælum frá EASA vegna massamiðju

16. september 2019

|

Frétt skrifuð kl. 09:32

Farþegarými um borð í Airbus A320neo þotu Lufthansa

Lufthansa hefur ákveðið að hindra aðgang farþega að síðustu sætaröðinni um borð í Airbus A320neo þotum félagsins sem eru ekki í boði eins og stendur þegar bókað er flug.

Fram kemur að Lufthansa hafi áhyggur af atriðum sem varðar massamiðju á Airbus A320neo þotunum og hafi félagið því ákveðið að síðasta sætaröðin verður ekki í boði fyrir farþega í auknablikinu.

Airbus A320neo þotur Lufthansa taka 186 farþega sem þýðir að þessa daganna verður að hámarki 180 farþegar settir um borð í hverja þotu en félagið hefur 20 Airbus A320neo þotur í flotanum.

Massamiðja, sem á ensku nefnist „Center of Gravity“, einnig þekkt sem „CG“, er beytilegur þyngdarpunktur flugvéla sem afmarkar jafnvægismiðju vélanna en þessi punktur verður að vera innan ákveðinna marka til að stöðugleiki vélarinnar haldist er hún er á flugi og er staðsetning massamiðju flugvéla eitt af grundvallaratriðum er kemur að flugöryggi.

Nýlega kom fram að flugöryggisstofnun Evrópu (EASA) hafi nýlega komið auga á vandamál er snýr að massamiðju Airbus A320neo vélanna sem koma með sæti fyrir 186 farþega sem tengist mögulegum aðstæðum sem gætu komið upp ef Airbus A320neo hættir við lendingu og fer í fráhvarfsflug („go around“) og er um að ræða samspil hæðarstýris og massamiðjunnar.

Airbus A320neo þota Lufthansa

Aldrei hafa komið upp nein tilvik eða vandamál með Airbus A320neo sem stafar af þessu en flugmálayfirvöld reyna ávallt að vera skrefinu á undan og fyrirbyggja atvik eða slys með því að koma auga á atriði og bregðast við með tilmælum um breytingu á regluverki eða skoðunum.

EASA hefur samt sem áður gefið út fyrirmæli þar sem félagið mælir með því að þeir flugrekendur, sem hafa Airbus A320neo í flota sínum, takmarki afturhleðslu á flugvélum af þessari gerð og er ein leiðin að hafa ekki of marga farþega aftast í vélinni.

Lufthansa er eina flugfélagið sem hefur þurft að grípa til aðgerða þar sem Airbus A320neo þotur félagsins koma með „Space Flex“ farþegarými sem kemur með einni sætaröð í viðbót miðað við hefðbundna útgáfu af A320neo þotum hjá öðrum flugfélögum.

Ekki er óalgengt að farþegar sem ferðar með minni flugvélum eru beðnir um að færa sig framar í flugvélina en í mörgum tilvikum er það gert þar sem flugvélin er orðin of afturþung.

Talið er að Lufthansa muni halda þessu fyrirkomulagi á næstunni eða þar til Airbus er komið með hugbúnaðaruppfærslu sem er ætlað að leysa þetta vandamál.