Þriðja flugbrautin fær grænt ljós hjá hæstarétti í Bretlandi

16. desember 2020

|

Frétt skrifuð kl. 13:11

Boeing 777 þota frá British Airways í flugtaki á Heathrow-flugvellinum í London

Hæstiréttur í Bretlandi hefur úrskurðað Heathrow-flugvelli í vil og gefið endanlegt leyfi fyrir framkvæmdum á þriðju flugbraut vallarins og þar með snúið við dómi frá afrýjunardómstóli í febrúar sem dæmdi fyrirhugaðar framkvæmdir ólögmætar þar sem þær væru ekki í takt við þann loftlagssamning sem bresk stjórnvöld höfðu undirritað.

Leyfi fyrir þriðju flugbrautinni var mótmælt og ákváðu nokkur umhverfissamtök og þar á meðal samtökin Plan B að fara með málið fyrir dómi á þeim forsendum að þriðja flugbrautin væri að stangast á við skuldbindingar bresku ríkisstjórnarinnar til umhverfismála.

„Þetta er rétta niðurstaðan fyrir landið og mun Bretlandi því tengjast enn betur við umheiminn. Þriðja flugbrautin á eftir að skapa þúsundir nýrra starfa í flugiðnaðinum. Eftirspurn eftir flugi mun ná sér aftur á strik eftir COVID-19“, segir talsmaður Heathrow-flugvallarins.

Áður en heimsfaraldurinn skall á þá var Heathrow-flugvöllurinn einn annasamasti flugvöllur heims sem var starfræktur með 99% nýtni. Mörg flugfélög hafa verið á biðlista eftir að fá afgreiðslupláss á Heathrow og hefur það verið eins og lottóvinningur þegar nýtt flugfélag fær úthlutað plássi á flugvellinum.

Þriðja flugbrautin verður staðsett norður af flugvellinum, norður af 09L/27R brautinni, og með þeirri braut mun stærsti flugvöllur Evrópu koma til með að hafa þrjár flugbrautir líkt og allir aðrir flugvellir sem eru í 2 til 8. sæti á lista yfir stærstu flugvelli Evrópu.

Þriðja flugbrautin hefur verið sl. ár mikið hitamál meðal breskra stjórnmálamanna en Boris Johnson, forsætisráðherra Bretlands, hefur lengi verið andvígur þriðju flugbrautinni og sagði Johnson, er hann var borgarstjóri Lundúna, að hann myndi persónulega leggjast á jörðina fyrir framan jarðýturnar til að koma í veg fyrir framkvæmdirnar.

Langt verður þó í það að framkvæmdirnar hefjist þar sem enn á eftir að undirbúa framkvæmdirnar en fyrstu skrefin verða að kynna þriðju flugbrautina fyrir samfélögum og íbúum í nærliggjandi hverfum. Áður hefur komið fram að rýma þurfi mörg svæði og rífa niður fjölda húsa til að búa til pláss fyrir þriðju flugbrautina.