Farþegaþotu með 62 manns um borð saknað í Indónesíu

- Hvarf af ratsjá í 10.000 fetum skömmu eftir flugtak í Jakarta

9. janúar 2021

|

Frétt skrifuð kl. 15:17

Þotan sem hvarf af ratsjá ber skráninguna PK-CLC

Leit stendur yfir að farþegaþotu af gerðinni Boeing 737-500 sem hvarf af ratsjá skömmu eftir flugtak frá borginni Jakarta í Indónesíu í morgun.

Þotan, sem er frá flugfélaginu Sriwijaya Air, fór í loftið frá Jakarta klukkan 7:36 í morgun að íslenskum tíma áleiðis til Pontianak á eyjunni Borneó í Indónesíu en um borð voru 56 farþegar og sex manna áhöfn.

Þotan, sem var í flugtaksklifri, var komin í 10.800 feta hæð og hafði fengið heimild til þess að fara upp í fluglag FL290 þegar samband við flugvélina rofnaði auk þess sem hún hvarf af ratsjá klukkan 7:40 eða fjórum mínútum eftir flugtak.

Samgönguráðuneyti Indónesíu hefur staðfest að samband hafi rofnað við farþegaþotu sem hvarf af ratsjá og hefur fyrsti hópur björgunarsveita verið sendur af stað til þess að leita að flaki vélarinnar og hefur þegar fundist brak í sjónum nálægt Lancang-eyju.

Flugferill þotunnar eftir flugtakið frá Jakarta á Flightradar24.com

Fram kemur að skömmu eftir flugtak hafi flugvélin, sem ber skráninguna PK-CLC, fengið heimild til þess að fara upp í 29.000 fet þegar hún var í 1.700 feta hæð en flugumferðarstjórnin sem sér um brottfarir (departure control) gaf því gaum skömmu síðar að flugvélin var ekki að fljúga þá stefnu sem henni hafði verið gefið sem var 075° gráður sem er norðaustlæg stefna og var þotan þess í stað að stefna til norðvesturs.

Reynt var að hafa samband við þotuna en ekkert svar barst og skömmu síðar hvarf hún af ratsjá hjá flugumferðarstjórum. Samkvæmt vefsíðunni Flightradar24.com þá kemur fram að flugvélin hafi misst hæð sem samsvarar 10.000 fetum á innan við mínútu.

Að minnsta kosti tveir sjónarvottar telja sig hafa séð flugvélina falla til jarðar og segir einn sjómaður í viðtali við BBC í Indónesíu að hann hafi séð eitthvað falla á miklum hraða ofan í sjóinn sem síðan sprakk á yfirborðinu.

Björgunarlið hefur þegar fundið brak á sjónum sem á eftir að greina og staðfesta að tilheyri þotunni

Veðurupplýsingar á Soekarno-Hatta flugvellinum í Jakarta, á þeim tíma sem þotan fór í loftið, sýna að lítilsháttar rigning hafi verið með skúraskýjum (CB) í 1.700 fetum en hálftíma áður hafði þrumuský verið í nágrenni vallarins en vindur var þó hægur með 6 knútum á braut.

Þotan er eins og áður segir af gerðinni Boeing 737-500 og er hún 27 ára gömul. Þotan tilheyrir svokallaðri „Classic-útgáfu“ af Boeing 737 og kom 737-500 tegundin á markað árið 1987 en 389 eintök af þeirru þotu voru smíðuð fram til ársins 1990.

Frá blaðamannafundi sem fram fór í Pontianak skömmu eftir að flugvélin hvarf af ratsjá