Ákveða þak á hækkun gjalda á Heathrow-flugvellinum

- Fá ekki leyfi fyrir eins mikilli hækkun og vonir voru bundnar við

20. október 2021

|

Frétt skrifuð kl. 07:15

Frá Heathrow-flugvellinum í London

Bresk flugmálayfirvöld hafa komið fram með hugmyndir og takmarkanir á fyrirhugaða hækkun á flugvallar- og lendingargjöldum á Heathrow-flugvellinum.

Ekki kemur fram hversu mikil hækkunin verður en flugmálayfirvöld veita flugvellinum þó ekki leyfi fyrir eins mikilli hækkun og stjórn flugvallarins gerði sér vonir um en hækkunin mun leggjast á þau flugfélög sem fljúga um Heathrow-flugvöll.

Flest flugfélög eiga eftir að neyðast til þess að hækka fargjöld sín á flugi til London Heathrow og eru mörg flugfélög mjög ósátt við fyrirhugaða hækkun þar sem hún á eftir að bitna á farþegum.

Heathrow-flugvöllurinn hefur ákveðið að grípa til hækkunar til að bæta upp fyrir það tap sem flugvöllurinn hefur orðið fyrir vegna heimsfaraldursins en mögulega er um að ræða allt að 6.000 króna hækkun á flugvallargjöldum á hvern farþega miðað við gjöldin árið 2020.

Bresk flugmálayfirvöld ákveða hámarkshækkun og fyrirskipa ramma varðandi slík gjöld en næsta gjaldtímabil tekur í gildi árið 2022 og mun gilda til fimm ára.

Stjórn Heathrow-flugvallarins fer fram á að núverandi gjöld hækki frá 5.700 krónum til 7.600 krónum á hvern farþega en bresk flugmálayfirvöld mæla með hækkun upp á 4.200 krónum til 6.000 krónur.

„Þetta tilboð okkar er gert til þess að vernda neitandann gagnvart óheiðarlegum hækkunum en mun einnig gera Heathrow-flugvellinum kleift að starfa eftir sem bestu getu á sjálfbæran hátt“, segir Richard Moriarty, yfirmaður breskra flugmálayfirvalda.

Fyrirhuguð hækkun hefur valdið reiði meðal marga og þar á meðal hjá Willie Walsh, framkvæmdarstjóra Alþjóðasamtaka flugfélaganna (IATA) sem áður var framkvæmdarstjóri IAG, móðurfélags British Airways, sem er stærsta flugfélagið sem flýgur til og frá Heathrow-flugvelli.

Walsh fordæmir hækkunina og segir að slík hækkun eigi eftir verða til þess að hin hefðbundna breska fjölskylda þurfi að greiða um 17.000 krónur meira til þess að ferðast með flugi í fríið frá Heathrow-flugvelli.

„Í stað þess að skella skuldinni á almenning sem er á faraldsfæti til þess að bæta upp tapið þá ættu fjárfestar frekar að nýta tækifærið og fjárfesta í flugvellinum“, segir Walsh.