FAA leitar að hönnuðum fyrir nýja flugturna

29. október 2021

|

Frétt skrifuð kl. 07:36

Flugturninn á flugvellinum í Houston í Bandaríkjunum

Bandarísk flugmálayfirvöld (FAA) hafa formlega hafið leit að fyrirtæki til þess að taka að sér hönnun á næstu kynslóð af flugturnum fyrir fjölmarga flugvelli víðsvegar um Bandaríkin.

Í dag eru yfir 100 flugturnar í Bandaríkjunum sem eru komnir til ára sinna sem þurfa endurnýjun og þarf á einhverjum tímapunkti að reisa nýja í stað þeirra.

Flestir flugturnarnir, sem þarf að skipta út, eru staðsettir á minni flugvöllum og þeim innanlandsflugvöllum sem flokkast sem svæðisflugvellir (regional airports).

„Fyrir smærri og stærri flugvallarsamfélög þá eru flugturnarnir það sem gerir þau táknræn. Við þurfum arkitekta og verkfræðinga hvaðan sem er í Bandaríkjunum til þess að aðstoða okkur við að byggja örugga og sjálfbæra flugturna fyrir framtíðina“, segir Pete Buttigieg, samgönguráðherra Bandaríkjanna, í yfirlýsingu frá Bandarískum flugmálayfirvöldum.

Fram kemur að leitað sé að hönnuðum eða hönnunarfyrirtæki sem geta hannað flugturna sem þurfa að uppfylla rekstrarleg skilyrði og með starfsumhverfi í huga. Þá þurfa flugturnarnir að vera hannaðir svo þeir bjóði upp á hagkvæmni og þarf stjórnbyggingin sjálf efst á turninum að vera hönnuð svo hægt sé að hafa hana í hvaða hæð sem er á hverjum flugvelli fyrir sig.

Flugturninn á flugvellinum í Sacramento var hannaður af I.M. Pei á sjöunda áratugnum

Tekið er sem dæmi nýr flugturn sem verið er að reisa á flugvellinum í Tucson í Arizona en sá turn er sá fyrsti í Bandaríkjunum sem gengur algjörlega fyrir vistvænni orku með 1.600 sólarsellum sem veitir turninum allt það rafmagn sem hann þarf.

FAA fór þessa sömu leið á sjöunda áratug síðustu aldar þegar leit var gerð af hönnuði til að hanna flugturna á þeim tíma og varð það bandaríski-kínverski arkitektin I.M. Pei sem varð fyrir valinu en John F. Kennedy, þáverandi forseti Bandaríkjanna, fór fram á flugturna sem endurspegluðu stollt, framtak og metnað Bandaríkjanna.

Svo fór að Pei hannaði flugturn fyrir 16 flugvelli í Bandaríkjunum og eru margir af þeim ennþá í notkun í dag og þar á meðal er þá að finna á flugvöllunum í Jacksonville, Chicago O´Hare og í Sacramento.

FAA mun velja úr hópi umsækjenda sex aðila sem hver og einn fær 100.000 Bandaríkjadali (12.8 milljónir króna) fyrir þeirra framlag til þess að koma með hugmyndir af stækkanlegum, sjálfbærum og stöðluðum flugturni ásamt kostnaðaráætlun.