Þrýsta á að starfslokaaldur upp á 65 ár verði endurskoðaður

- IATA hvetur ICAO til þess að hækka aldurstakmarkið hærra en 65 ár

15. ágúst 2022

|

Frétt skrifuð kl. 12:07

Starfslokaaldurinn var seinast hækkaður úr 60 árum upp í 65 ár árið 2006

Alþjóðasamtök flugfélaganna (IATA) óska nú eftir því að starfslokaaldur atvinnuflugmanna verði hækkaður í von um að það muni auðvelda flugfélögum að hafa næga flugmenn á sama tíma og spár gera ráð fyrir þörf fyrir mun fleiri flugmönnum á næstu árum heldur en framboð leyfir.

IATA hefur nú þegar sent greinargerð til þings Alþjóðaflugmálastofnunarinnar (ICAO) en í dag miðast starfslokaaldur í flestum löndum við 65 ár og geta flugmenn ekki flogið atvinnuflug lengur eftir að þeim aldri er náð.

Í greinargerð IATA er ICAO hvatt til þess að skoða til hlítar nýjustu vísindarannsóknir á takmörkunum á getu flugmanna vegna aldurs og segir meðal annars að setja skorður á vel hæfa flugmenn setur þvinganir á að flugiðnaðurinn eigi eftir að ná sér í kjölfar heimsfaraldursins og sé einmitt því ástæða nú að endurskoða starfslokaaldurinn.

Starfslokaaldur upp á 65 ár hefur verið við lýði frá árinu 2006 en þá var hann hækkaður úr 60 árum.

„Talið er að eftirspurn eftir flugi eigi eftir að ná sömu tölum og var árið 2019 strax á næsta ári og eftir það mun hún halda áfram að aukast og á sama tíma mun eftirspurn eftir flugmönnum fara fram úr framboðinu“, segir í yfirlýsingu frá IATA.

Óháð heilsufari þá þurfa allir atvinnuflugmenn að segja skilið við starfsferilinn þegar þeir verða 65 ára

„Það er því tímabært að endurskoða aldurstakmarkið og tryggja að þeir séu hæfir til að sinna sínu starfi áfram í stað þess að hindra framgang og áframhaldandi vöxt meðal flugfélaganna“, segir ennfremur.

Fram kemur að núverandi 65 ára aldurstakmark hafi verið byggður á ýmsum rannsóknum og þar á meðal metið út frá niðurstöðum á árangri í flughermum. Rannsóknir benda til þess að áhættan á því að öryggi flugsins sé ógnað ef annar flugmannana veikist skyndilega sem rekja megi til aldurs svo að hætta sé á ferðum sé mjög lítil í starfsumhverfinu eins og það er í dag.

Í greinargerð segir að hærri meðalævilengd, aukin sjálfvirkni í stjórnklefa, betri og nútímalegri þjálfun í flughermi og aukin vitund hafi dregið verulega úr áhættunni á skyndilegri óvinnufærni vegna veikinda.

„Það er verið að þvinga fram skerðingu á réttindum þeirra sem hafa flugmannsskírteini í gildi þrátt fyrir að þeir standist strangar læknisskoðanir og uppfylli heilbrigðiskröfur og þjálfun í flughermi fram á síðasta dag áður en þeir verða 65 ára“, segir í greinargerð.