Næsti hópur atvinnuflugnema fer af stað í janúar

3. nóvember 2022

|

Frétt skrifuð kl. 07:02

Samtvinnað atvinnuflugnám og einkaflugnám hefst þann 6. janúar næstkomandi hjá Flugakademíu Íslands

Næsti hópur nemenda í samtvinnuðu atvinnuflugnámi hjá Flugakademíu Íslands fer af stað í janúar 2023 og er hægt að sækja um námið þar til 29. nóvember næstkomandi.

Samtvinnað atvinnuflugnám er tilvalið fyrir þá sem eru með litla eða enga flugreynslu og vilja öðlast atvinnuflugmannsréttindi að námi loknu. Námið hjá Flugakademíunni hefst 6. janúar og tekur um 24 mánuði að ljúka því, bóklegu og verklegu námi, frá upphafi til enda. Ekki þörf á einkaflugmannsskírteini til að geta hafið nám.

Samtvinnað atvinnuflugnám hjá Flugakademíu Íslands er krefjandi og faglegt nám frá fyrsta degi og kallar á mikinn sjálfsaga nemenda og vinnu við að ná settu markmiði. Námið er sniðið að þörfum þeirra sem stefna á frama sem atvinnuflugmenn þar sem nemendum er fylgt eftir frá fyrstu flugferð að atvinnuflugmannsskírteini.

Að loknu námi öðlast nemendur samevrópskt atvinnuflugmannsskírteini, ásamt öllum þeim réttindum sem til þarf, til að geta starfað sem atvinnuflugmaður hjá evrópskum flugrekanda. Skólinn heldur vel utan um nemandann út námstímann og eru allir áfangar og flug (bókleg og verkleg þjálfun) skipulögð fram í tímann. Námið er lánshæft að hluta sem fjögurra anna nám hjá Menntasjóði námsmanna og er eina lánshæfa flugnámið hér á landi hjá sjóðnum.

Einkaflugnám fer einnig af stað 6. janúar hjá Flugakademíunni og tekur bóklegi hlutinn 6 vikur þar sem kennt er í kvöldskóla. Einkaflugnám hentar þeim sem vilja verða einkaflugmenn og vilja stunda sjónflug á litlum einshreyfils flugvélum, sér og farþegum sínum til ánægju. Einkaflugnám getur líka verið fyrsta skref í átt að atvinnuflugmannsréttindum ef áfangaskipt atvinnuflugnám hentar betur.

Áhugasamir hvattir til að mæta á kynningarfund

Flugakademía Íslands mun bjóða upp á kynningarfundi dagana 8. og 22. nóvember kl. 17.00 þar sem fólki gefst kostur á að fræðast um flugnám. Kynningarfundirnir fara fram í bóklegri kennsluaðstöðu skólans að Ásbrú (Grænásbraut 910, 262 Reykjanesbæ) þar sem stuttir fyrirlestrar verða haldnir um flugnám, námsleiðir í boði, fjármögnun og atvinnumöguleika að námi loknu.

Að loknum fyrirlestri gefst gestum tækifæri að skoða aðstöðu Flugakademíunnar á Ásbrú, kíkja á flugherma og ræða við kennara.