NTSB skoðar flugrita sem sendir upplýsingar frá sér jafnóðum

- Tæknilið fundar reglulega um þróun á slíkum búnaði

31. mars 2014

|

Frétt skrifuð kl. 10:33

Erin Gormley, flugvélaverkfræðingur hjá NTSB sýnir tölvuflögu úr flugrita á fréttamannafundi sl. föstudag í Washington

Samgönguöryggisnefnd Bandaríkjanna (NTSB) segir að verið sé að skoða möguleika með flugrita sem streymir upplýsingum frá sér beint úr flugvél til jarðar gegnum gervihnött.

Eftir að malasíska farþegaþotan hvarf af radar hefur mikið verið rætt um hversvegna ekki sé til staðar tækni sem sendir upplýsingar jafnóðum beint úr flugrita svo hægt sé að finna týnda flugvél eða flak á auðveldari hátt í stað þess að leita í mörg ár að svarta kassanum.

Joe Kolly, hjá NTSB, segir að þessar spurningar vöknuðu fyrst eftir að það tók 2 ár að finna svarta kassann úr Air France vélinni sem fórst yfir Atlantshafinu árið 2009.

Kolly segir að yfirmenn NTSB ásamt öðrum rannsóknarnefndum, Alþjóðaflugmálastofnunin (ICAO), framleiðendur á flugritum og flugfélög væru nú þegar að skoða þær leiðir sem standa til boða til að koma upp með tækniaðferð sem gæti streymt takmörkuðum flugupplýsingum jafnóðum úr flugvél.

"Það er starfsfólk og tæknilið á okkar vegum sem hittist reglulega á fundum þar sem tækniatriði eru rædd og fundað um hvaða upplýsingar það eru sem við viljum að hægt sé að streyma úr svarta kassanum", segir Kolly sem bendir á að flugiðnaðurinn sé stanslaust að ræða hvað hægt sé að gera til að auka öryggið enn frekar.

Tæknin sjálf þegar til staðar

Á meðal þeirra fyrirtækja sem taka þátt í þróuninni er kanadíska fyrirtækið FLYHT Aerospace Solutions sem þróar upplýsingatækni sem tengir internet við gervihnetti sem 40 flugfélög í dag hafa nýtt sér til að geta haft eftirlit með flugvélum sínum og fá lifandi upplýsingar um fluglag og stöðu véla sinna.

Ein leiðin sem kæmi til greina er þjónusta sem FLYHY hefur þróað sem kallast "Automated Flight Information Reporting System" þar sem flugritar senda upplýsingar frá sér í neyðartilfellum.

Notkunin kostar 560 krónur á klukkustund á hverja vél

Um 11 milljónir króna kostar að koma kerfinu fyrir um borð í hverja flugvél og 560 krónur kostar að nota kerfið fyrir hverja klukkustund sem flogin er.

Alls eru 350 flugvélar í dag með búnaðinn frá FLYHY og þ.á.m. vélar sem fljúga yfir mjög afskekt landsvæði í heiminum á borð við Alaska, Kanada, Afríku, Afghanistan og Rússland.

Búnaðurinn leysir ekki af hólmi hefðbundna flugrita heldur er um viðbót að ræða þar sem búnaðurinn er ekki hannaður til að standast flugslys.