Ekki einu sinni flugstjórar Emirates hafa kunnáttu til að láta Boeing 777 hverfa

- "Við erum með stærsta Boeing 777 flota heims og þess vegna verð ég að fá svör"

6. júní 2014

|

Frétt skrifuð kl. 16:53

Tim Clark, forstjóri Emirates

Tim Clark, forstjóri Emirates segir að rannsóknin á hvarfi malasísku farþegaþotunnar sé mjög slök og sé ekki haldið rétt á spilunum varðandi leitina að vélinni.

"Við [Emirates] erum með stærsta flugflotann af Boeing 777 af öllum flugfélögum í heiminum og ég verð að fá svar við því hvernig einhver getur brotist í gegnum kerfi vélarinnar. Það er eitthvað ekki rétt í þessu öllu saman og við verðum að komast til botns í því", sagði Clark á árlegri ráðstefnu IATA sem fram fór í Doha.

Clark gagnrýndi m.a. hvernig staðið hefur verið að leitinni að vélinni og eru mjög mörgum spurningum enn ósvarað og sé augljóst að a.m.k. þrjú kerfi um borð í vélinni voru gerð óvirk af mannavöldum.

"Það þarf mikla kunnáttu til að aftengja sum þessara kerfa og ekki einu sinni flugstjórarnir hjá Emirates vita hvernig það er gert - einhver komst um borð í vélina og vissi nákvæmlega hvað ætti að gera", segir Clark.

Snýst ekki um að rekja og staðsetja flugvélar enn betur

"Við höfum ekki týnt farþegaþotu í 50 ár - við höfum alltaf vitað hvar þær eru. Hver sem það var, sem var svona snjall að aftengja staðsetningarsenda vélarinnar, gæti leikið þennan leik aftur".

Clark segir að málið snúist ekki um að rekja farþegaþotur enn betur eins og umræðan hefur snúist um síðan að vélin hvarf fyrir 3 mánuðum síðan - "Eina sem þarf að gera er að hleypa engum um borð sem ætlar sér að aftengja ACARS-búnaðinn - málið dautt", segir Clark.

Clark segir að það skelfilegasta sem gæti gerst er ef flugheimurinn ákveður að halda áfram sínu striki og leyfa þessu að verða stærstu óleystu ráðgáta veraldar - "Við verðum að finna þessa vél og ég vona að hún finnst og þeir finni flugritann og hljóðritann".

"Ég vill fá að vita hvað var í fraktinni, hvað störfuðu allir farþegarnir við, hvert voru þeir að fara, hvers vegna voru þeir að ferðast, hverjir komu með fraktina um borð, hver var sendandinn - Kannski er verið að gera eitthvað í þessu en við erum ekki að heyra neitt um það - Þetta er ekkert gert opinbert þar sem allt er svo dulið og engin spil sett upp á borðið nema stöku sinnum".

"Eins og ég sagði þá erum við með stærsta flotann af Boeing 777 og ég vil fá að vita hvernig hægt er að láta þessa vél hverfa".