FAA gefur jólasveininum leyfi til að hefja flug með gjafir frá Norðurpólnum

- Xliner Globecruiser 8800 sleðinn tilbúinn eftir C-skoðun

20. desember 2014

|

Frétt skrifuð kl. 18:01

Nýi "Santa One" Xliner Globecruiser 8800 sleðinn hefur fengið leyfi til að fljúga inn í bandaríska lofthelgi um jólin

Ameríski jólasveinninn er komin með leyfi til að fljúga um öll helstu flugumferðarsvæði í heiminum til að dreifa jólapökkum til þægra barna um jólin

John Kirby, ritari hjá varnarmálaráðuneyti Bandaríkjanna, sagði að bandarísk flugmálayfirvöld (FAA) hafi gefið út leyfi til jólasveinsins svo hann geti átt greiða leið um bandaríska lofthelgi en hann þarf að krækja sér gegnum mjög þétta flugumferð yfir Bandaríkjunum og þá sérstaklega yfir norðaustur fylkjunum.

Sleði ameríska jólasveinsins er útbúinn GARMIN leiðsögukerfi og og hefur hann sérstakt GPS kerfi sem reiknar út hvaða börn eiga eftir að fá pakka en aðeins í Bandaríkjunum eru 117 milljón heimili en jólasveinnin mun þó sleppa einhverjum heimilum þar sem óþæg börn búa.

Santa One á Flightradar24 árið 2013

Nýkominn úr C-skoðun

Kallmerki jólasveinsins er "Santa One" og er sleðinn knúinn áfram með níu hreindýrum en sleðinn gekkst undir C-skoðun á Norðurpólnum í nóvember en skipta þurfti um annað skíðið sem skemmdist lítillega í tilraunaflugi í Kanada í haust er jólasveinninn var að æfa lendingar á húsþaki og rakst það utan í skorstein.

Níunda hreindýrinu bætt við

Santa Polar Aviation, sem á og rekur sleða jólasveinsins, segir að árið 2011 hafi níunda hreindýrinu verið bætt við sleðann til að auka hagkvæmni flugsins frá Norðurpólnum sem tekur 10 klukkustundir en hvert hreindýr fer með 12 kíló af blöndu af grasi, mosa og sveppum fyrir utan Rúdolf sem fer með 15 kíló á klukkustund.

"Santa One" sleðinn er af gerðinni Xliner Globecruiser 8800 og er hann af Nextgen kynslóðinni en hann var smíðaður árið 2010 og kostaði um 56 milljarða króna en jólasveinnninn hefur lagt inn pöntun í Xliner 9900 Nobuz sem kemur á markaðinn árið 2018.

Þá hefur verið bætt við nýju NHSSB-kerfi ("Northern Hemisphere Satellite Surveillance-Broadcast") í rauða nefinu á Rúdolfi til að auðvelda álfunum á flugturninum á Norðurpólnum að fylgjast betur með ferðum jólasveinsins.

Þess má geta að fjarflugsleyfi á sleðanum hefur verið hækkað upp í ETOPS-240 sem þýðir að jólasveinninn má vera í allt að 4 klukkustunda fjarlægð frá næsta viðurkennda flugvelli ef eitthvað kemur upp á.