Lögregla fær flugáhugamenn við Heathrow til liðs við sig

- Útvaldir fá flugvallarpassa í sjálfboðastarfi

14. janúar 2019

|

Frétt skrifuð kl. 21:58

Flugáhugamenn við Heathrow-flugvöllinn

Lögreglan í Bretlandi hefur sent frá sér tilkynningu þar sem þeir flugáhugamenn, sem leggja leið sína út á Heathrow-flugvöll til þess að horfa á og taka myndir af flugvélum, eru beðnir um að hafa augun opin og láta vita ef þeir sjá til einhverra sem eru að fljúga drónum í nágrenni flugvallarins eða til grunsamlegra mannaferða.

Á hverjum degi eru margir sem leggja leið sína út á Heathrow-flugvöll til þess að berja flugvélar augum en hvergi í Bretlandi er eins mikil flóra af flugvélum sem lenda og taka á loft líkt og á Heathrow-flugvelli sem laðar að flugáhugamenn.

Fjöldi flugáhugamana og ljósmyndara dvelja við Heathrow-flugvöll klukkutímum saman og vill lögreglan í Bretlandi virkja þennan hóp þar sem þeir sjá margt sem flugvallaryfirvöld ná ekki að koma auga á.

Færsla á Twitter-síðu London Met Police

Þá geta þeir sem vilja ganga skrefinu lengra við að aðstoða lögreglu gerst sjálfboðaliðar með því að taka þátt í verkefninu „Heathrow Airport Watch“ - „Tilgangurinn er sá að fá aðstoð við að koma í veg fyrir glæpi eða hryðjuverk með því að láta flugáhugamenn tilkynna tafarlaust ef þeir sjá einhverjar grunsamlegar mannaferðir eða eitthvað sem lítur út fyrir að vera óeðlilegt“, segir í tilkynningu frá lögreglu.

Þátttakendur í verkefninu fá passa með ljósmynd sem þeir setja um hálsinn á sér auk vestis en með því eru þeir auðþekkjanlegir af lögreglu og öryggisvörðum.

Umsækjendur þurfa að greiða 7.50 sterlingspund sem nemur 1.100 krónum vegna framleiðslu á aðgangspössum og þá er farið fram á að flugáhugamenn, sem taka þátt í verkefninu, kynni sér fræðsluefni um lög og reglur er kemur að umferð á flugvallarsvæðinu.

Verkefnið gengur út á að fyrirbyggja að sambærileg drónaárás endurtaki sig líkt og sú sem átti sér stað rétt fyrir jólin er tveimur drónum var flogið ítrekað yfir Gatwick-flugvöll sem varð til þess að flugumferð um völlinn lá niðri á annan sólarhring.

Lögreglan í Lundúnum tekur sérstaklega fram að ekki sé um launað starf að ræða heldur einungis sjálfboðavinnu og notar lögreglan hashmerkið #AvGeek til að ná til flugáhugamanna.

Flugljósmyndari við Myrtle Avenue götuna rétt hjá Heathrow-flugvelli