Sagt að EASA hafi sniðgengið kynningu Boeing á uppfærslunni

- Einn flugmaður á Boeing 737 MAX gekk út af kynningunni í Renton

31. mars 2019

|

Frétt skrifuð kl. 23:16

Ný Boeing 737 MAX þota í Renton

Sagt er að fjölmargir aðilar á vegum evrópskra flugmálayfirvalda (EASA) auk einhverra flugmanna og starfsmanna flugfélaga ákváðu að sniðganga boð Boeing um að vera viðstaddir kynningarfund flugvélaframleiðandans í síðustu viku þegar uppfærslan á MCAS-kerfi Boeing 737 MAX þotunnar var formlega kynnt sem framleiðandinn segir að sé tilbúin.

Um 200 aðilum var boðið að vera viðstaddir kynninguna sem fór fram í verksmiðjum Boeing í Renton en Boeing mun á næstunni senda sérfræðinga til Evrópu til að kynna MCAS-uppfærsluna fyrir EASA en ekki er vitað hvort að flugmálastofnunin hafi ákveðið að hitta starfsmenn Boeing.

Álit þeirra flugmanna sem fljúga Boeing 737 MAX á öryggi vélarinnar er almennt mjög gott og og segja flestir flugmenn að þotan og kerfi hennar virka nákvæmlega eins og þau eigi að gera og sumir segja að kyrrsetningin hafi verið óþörf.

„Okkur leist mjög vel á þessa flugvél eins og hún var fyrir breytinguna á MCAS-kerfinu. Þessar endurbætur hafa gert hana bara enn betri“, segir einn flugstjóri sem flýgur Boeing 737 MAX hjá American Airlines.

Ekki eru allir flugmenn sáttir út í Boeing en einn flugmaður, sem flýgur Boeing 737 MAX, strunsaði út af kynningarfundi Boeing sl. miðvikudag þar sem honum finnst að Boeing þurfi að gera betur er kemur að viðbótarþjálfun fyrir MCAS-uppfærsluna en að bjóða upp á 30 mínútna kynningarmyndband fyrir flugmenn sem hægt er að nálgast á iPad-spjaldtölvu.

Hvort sem að EASA hafi vísvitandi ekki vilja kynna sér uppfærsluna á MCAS-kerfinu í Bandaríkjunum, sem Boeing segir að sé tilbúin fyrir uppsetningu, þá er talið að þetta endurspegli þann pólitíska ríg sem upp er komin milli flugmálayfirvalda í Evrópu og flugmálayfirvalda í Bandaríkjunum (FAA) sem margir telja að sé orðin of náin Boeing.

Sérfræðingur einn hjá fyrirtækinu JPMorgan segir að flugmálayfirvöld í mörgum löndum í heiminum muni taka afstöðu til viðbragða frá EASA þegar þar að kemur en álit margra landa er að miklu leyti háð því hvaða dóm evrópsk flugmálayfirvöld eigi eftir að leggja á uppfærsluna.

Flugmálayfirvöld í Evrópu, Kanada og í Kína ætla sér að framkvæma sína eigin úttekt á MCAS-uppfærslunni óháð því hvað vottun bandarískra flugmálayfirvalda (FAA) mun fela í sér.