Boeing 737-800 fórst í innanlandsflugi í Kína í morgun

- 123 farþegar um borð og níu manna áhöfn

21. mars 2022

|

Frétt skrifuð kl. 20:31

Þotan var í innanlandsflugi í Kína frá Kunming til Guangzhou þegar hún fórst um kl. 6 í morgun að íslenskum tíma

Talið er að enginn hafi komist lífs af er farþegaþota af gerðinni Boeing 737-800 frá kínverska flugfélaginu China Eastern Airlines fórst er hún var í innanlandsflugi í Kína í morgun.

Þotan var í áætlunarflugi frá borginni Kunming til Guangzhou með 123 farþega um borð og níu manna áhöfn. Þotan fór í loftið frá Kunming klukkan 13:11 að staðartíma (05:11 að íslenskum tíma) og átti hún að lenda í Guanzhou klukkan 15:05.

Flugvélin var í um 29.000 feta hæð og var stutt í lækkun þegar hún missti skyndilega hæð og hrapaði hún lóðrétt niður til jarðar á miklum hraða á tveimur og hálfri mínútu og kom niður í fjalllendi sem er í um 3.200 feta hæð yfir sjávarmáli sem jafngildir lækkunarhraða (vertical speed) upp á 10.300 fetum á mínútu.

Stór gígur myndaðist á slysstaðnum og er lítið um heillegt brak að sjá

Flugmálayfirvöld í Kína hafa staðfest að þotan hafi farist skömmu eftir að samband við hana rofnaði í um 220 kílómetar fjarlægð vestur af Guangzhou.

Þotan kom niður í afskekktu fjalllendi og hafa verið birtar drónamyndir sem sýna að ekkert er eftir af flugvélinni nema fíngert brak í gíg sem myndaðist í trjálendi. Um 600 manna björgunarlið var sent á vettvang.

Flugvélin bar skráninguna B-1791 og var hún 6 og hálfs árs gömul en hún var afhent til China Eeastern Airlines í júní árið 2015.

China Eastern Airlines er eitt af þremur stóru flugfélögunum í Kína en félagið hefur tæplega 600 flugvélar í flota sínum og þar af 108 af gerðinni Boeing 737-800 sem er næst algengasta flugvélategundin í flotanum.

Flugöryggi í Kína með því betra sem þekkist í heiminum

Orsök slyssins eru enn ókunn en flugöryggi í Kína hefur verið með því betra sem þekkist í heiminum og má þess geta að Kína tók fram úr Bandaríkjunumn er kemur að flugöryggi árið 2020.

Þar á undan hafði flugöryggi í Kína verið ábótavant og voru mörg mannskæð flugslys í landinu á tíunda áratugnum og þar á meðal 7 flugslys frá árinu 1992 til ársins 1994 en í kjölfarið bað ríkisstjórn landsins um aðstoð frá bandarískum flugmálayfirvöldum (FAA) um ráðgjöf varðandi úrbætur sem setti Kína á kortið sem eitt öruggasta land í heimi er kemur að flugöryggi.

Seinasta mannskæða flugslysið í Kína átti sér stað í ágúst árið 2010 er farþegaþota af gerðinni Embraer ERJ190LR frá Henan Airlines varð alelda er hún brotlenti skömmu fyrir lendingu á Yichun Lindu flugvellinum með þeim afleiðingum að 42 létust af þeim 96 sem voru um borð.

Þá hefur China Eastern Airlines tilkynnt að félagið hafi tekið þá ákvörðun að kyrrsetja allar Boeing 737-800 þotur félagsins í kjölfar slyssins.

Hluti af enda hægri vængs þotunnar: