Vilja hækka starfslokaaldur flugmanna upp í 67 ár

- Lausn til skemmri tíma við flugmannaskorti en langtímalausnin er fleiri flugmenn

22. mars 2023

|

Frétt skrifuð kl. 21:06

Hópur sjö öldungardeildarþingmanna hefur unnið að tillögu að breytingu á reglugerð um starfslokaaldur atvinnuflugmanna

Bandaríska öldungardeildarþingið lagði í gær fram tillögu sem tekin var fyrir á bandaríska þinginu þar sem farið er fram á að starfslokaaldur atvinnuflugmanna vestanhafs verði hækkaður í 67 ár en í dag er hann 65 ár eins og í flestum öðrum löndum.

Hópur sjö öldungardeildarþingmanna hefur unnið að tillögu að breytingu að þessari reglugerð en með henni er reynt að stemma stigu við þeim alvarlega flugmannaskorti sem blasir við í Bandaríkjunum og er þegar farinn að vera alvarlegur meðal minni flugfélaga sem fljúga svokallað svæðisflug (regional flights).

Flugiðnaðurinn vestanhafs fagnar tillögunni og þar á meðal RAA, félags svæðisflugfélaga (Regional Airlines Association), sem tekur fram að verulega væri hægt að draga úr skorti á flugmönnum ef reyndir flugmenn mættu halda áfram að fljúga eftir 65 ára aldur séu þeir við fulla heilsu.

„Á meðan að langtímalausnin er að einblína á þjálfun á fleiri flugmönnum og aðgengi að flugiðnaðinum og flugtengdum störfum þá þarf að grípa til aðgerða til skemmri tíma til að lágmarka hnignun í fluginu“, segir í yfirlýsingu frá RAA.

Starfslokaaldur í fluginu í Bandaríkjunum hefur ekki verið hækkaður síðan árið 2007

Fram kemur í tillögunni að flugmenn, sem hafa náð 65 ára aldri, yrðu myndu fara í ítarlega læknisskoðun á 6 mánaða fresti fram til 67 ára aldurs.

Talið er að það vanti um það bil 8.000 flugmenn til starfa hjá bandarískum svæðisflugfélögum (regional airlines) þar sem margir flugmenn taka sín fyrstu skref áður en þeir fá störf hjá stóru flugfélögunum.

Vilja einnig láta afnema 1.500 flugtíma reglugerðina

Gert er ráð fyrir að um 3.000 flugmenn hafi látið af störfum í heimsfaraldrinum vestanhafs og þá er von á að 12.000 flugmenn til viðbótar láti af störfum sökum aldurs á næstu 5 árum.

Þá telja bandarísk flugfélög að enn mætti gera betur með því að afnema 1.500 flugtíma regluna sem kveður á um að nýr flugmaður, sem ætlar að sækja um starf hjá bandarísku flugfélagi, verði að hafa að minnsta kosti 1.500 flugtíma að baki.

Þetta er ekki í fyrsta sinn sem að öldunardeildarþingið kemur með tillögu um að hækka starfslokaaldur upp í 67 ár en sú tillaga var einnig lögð fyrir þingið í júlí í fyrra.

Starfslokaaldur í Bandaríkjunum hefur ekki verið hækkaður í 16 ár en þá var hann hækkaður úr 60 árum upp í 65 ár árið 2007.